UNHA REPRESENTACIÓN DA CANDIDATURA CON QUINTANA

Xa ninguén pon en dúbida que o noso Concello precisa un cambio , e que este ha de chegar da man dun equipo de xente seria do pobo, con ganas de traballar, co apoio da Xunta de Galiza e capacitados para abordar o reto de administrar esta empresa que é a de todos e todas.

Contamos cunha candidatura sólida, de xente independente tanto politica como economicamente falando, sen compromisos previos, que reflicte as distintas sensibilidades e que representa a todos os sectores socias do noso Concello. Persoas capacitadas para gobernar Antas de Ulla
En poucas palabras:

”Queremos , podemos e sabémolo facer”.
Como candidato a Alcaldía síntome moi orgulloso de formar parte deste grupo, de ser o elixido para liderar esta lista e para defender un proxecto que desexamos cumpra coas expectativas de todos os veciños e veciñas de Antas.

CANDIDATURA

Nº 1 JAVIER DOVAL OTERO, funcionario de prisións. O Castro de Santa Cristina
" Estou orgulloso desta candidatura ".
Nº 2 LUÍS VÁZQUEZ ROJO, mestre . Antas de Ulla.
“A boa xestión e a eficacia administrativa son a nosa forma de facer política".
Nº 3 MARTÍN DÍAZ MARIÑO, informático Antas de Ulla.
“É preciso que volvamos a ter confianza en Antas. Hai solucións, pero necesitamos novas maneiras, novas persoas e novas ideas”
Nº 4 CRISTÓBAL LÓPEZ VÁZQUEZ, empresario da alimentación. O Cruceiro
“Polo cambio, con diálogo e transparencia porque Antas meréceo”
Nº 5 MARÍA ISABEL IGLESIAS MOURELLE, dependenta de supermercado. Antas de Ulla.

“ Esperta! . Somos moitos os que pensamos que isto pode cambiar”
Nº 6 MARCOS LEMA GARCÍA, electricista. Santa Mariña
“Gústame ver que si queda xente que realmente se preocupa polo pobo”
Nº 7 ALICIA GÓMEZ FERREIRO, empregada. Senande.
“Urxe dotar a Antas dun Polígono Industrial para intentar frear a fuxida da xente nova”
Nº 8 JOSÉ GONZÁLEZ QUINTA, labrador. San Mamede da Agüela.
“Prosperidade”
Nº 9 PILAR ALMUÍÑA GUERREIRO, empregada . Antas de Ulla.
“ Non hai peor cego que o que non quere ver”
Nº 10 DANIEL VÁZQUEZ FERREIRO, comercial de telecomunicacións. Regadío.
"Se queres o mellor para ti, elixe o mellor para Antas"
Nº 11 MANUEL VILARIÑO VÁZQUEZ, psicólogo. Castro de Amarante.
“A posibilidade dun concello con futuro é unha realidade,
está nas mans de todas e todos nós. Sexamos participes do cambio”
Nº 12 MERCEDES OTERO LÓPEZ, aparelladora. Antas de Ulla.
“Antas mellor que antes "
Nº 13 VANESA GARCÍA FERNÁNDEZ,Empregada. Barreiro.
"Escoitaremos as vosas propostas "
Nº 14 ALEJANDRO OTERO GARCÍA, técnico de frío. A Somoza.
“Agora é a mellor ocasión para facer algo de proveito polo concello”

A XENTE MOZA NON VAI FICAR CALADA.

Recentemente, realizamos dende o BNG de Antas de Ulla un estudo socio-económico no que fixemos unha análise comparativa do noso municipio cos limítrofes, nunha serie de variábeis. Dos resultados obtidos despréndese un futuro, certamente, complicado para os mozos e mozas que prantexen o seu futuro en Antas, de non se intervir de inmediato con medidas encamiñadas a reverter a situación actual. Así, ao analizar a porcentaxe de paro atopamos que dos seis concellos analizados Antas é o que presenta uns maiores valores de paro dentro da poboación activa ( máis do 13%) se continuamos afondando vemos que acontece o mesmo para a franxa de idade que vai dos 25 aos 49 anos (máis do 10%) e, sobre todo, destaca a alta porcentaxe para a poboación que vai dos 16 aos 24 anos (ao redor do 30%). Dos seis concellos somos os que presentamos uns valores máis altos de paro, sendo a nosa xente moza a que máis dificultades ten para encontrar traballo. De primeiras, é evidente que existe un problema de emprego en Antas que vén a ser consecuencia dunha determinada circunstancia económica que, en parte, aparece reflectida no noso estudo. Se nos preguntásemos por cales deberían ser os alicerces da nosa economía, as nosas fontes xeradoras de emprego e riqueza, a ninguén se lle escapa que o sector primario (agricultura e gandería) e as actividades industriais relacionadas co mesmo e doutro tipo deberían ocupar unha posición privilexiada. Pois ben, no estudo temos que Antas é o concello con menor número de explotacións gandeiras e de unidades de gando e, o que é máis importante, a relación unidades de gando/explotacións gandeiras é, novamente, a máis pequena dos seis concellos comparados. Xa que logo, se a nosa realidade gandeira (tamén poderíamos dicir a agrícola) non pasa por bos tempos sería necesario que existisen alternativas de produción que fagan fronte a esta eiva e, esencialmente, referímonos a actividades industriais de tipo variado. Novamente, os datos nesta variable volven a ser desalentadores, temos que a variación de actividades industriais do 2000 ao 2005 é negativa, é dicir, o número de actividades industriais que se crean en Antas é inferior ao número das que se perderon. Por certo, en ningún dos outros cinco concellos existe unha relación negativa, creándose neles máis actividades das que perden. Ben, xa temos estabelecidas, en parte, causas e consecuencias. Nas causas temos unha perdida progresiva de relevancia do sector primario (no noso caso gandería e agricultura) que afecta a toda a Galiza interior, froito do abandono e da deixadez que sufrimos por parte dos gobernos de dereitas que, até fai ben pouco, gobernaron a nosa nación e que continúan a gobernar no noso concello. Suponse que se aceptaron e nada fixeron para impedir a aniquilación e desmantelamento deste sector, mediante a súa adaptación á circunstancia económica actual, procurando a modernización do seu funcionamento tradicional, deberían crear outras fontes de riqueza, industrializando estas áreas que viron ficar en ben pouco a súa estrutura produtiva. Mais, como atopamos nos datos para o caso concreto do noso concello tal proceder non existe, quizais porque en Antas non exista un PXOM, quizais porque en Antas non temos solo industrial, quizais porque os nosos gobernantes só se preocuparon de se manter no poder “importándolle un carallo Antas”...non sei. Poderían, asemade, tratar de conseguir unha terciarización do país, fomentando o turismo, que parece que foi o mellor da súa acción a escala nacional, mais no noso concello nin iso fixeron, tendo en conta o enorme potencial que para tales fins temos. Chegado este punto, xa podemos citar as consecuencias que resultan evidentes: ausencia e precarización de postos de traballo, altas taxas de paro, baixas rendas nos fogares, emigración cara outras zonas máis prósperas (e non falo da Alemaña ou de Madrid, que tamén, mais falo, por exemplo, de Monterroso), despoboamento, perda de servizos, en definitiva, unha realidade de desaparición.
Podemos ficar calados ante este panorama?. Podemos consentir que se perpetúen no poder os mesmos de sempre, que nada fixeron e nada farán por conseguir un concello mellor?. Imos a consentir que o noso concello morra?. Non. Nas nosas mans está intentalo e podémolo conseguir, porque a xente moza representamos o motor do progreso e do cambio nas sociedades como ficou patente en moitas ocasións. Non podemos ser cómplices desta desfeita, non noso nome e non co noso consentimento. Loitemos polo noso futuro, polo futuro do noso concello.

Manolo Vilariño Vázquez

O CONCELLO DE ANTAS DE ULLA NON ASUME A SÚA RESPONSABILIDADE NA XESTION ORZAMENTARIA

O Concello de Antas de Ulla leva recibido varios requirimentos do Consello de Contas, un do ano 1999 e outro máis recente relativo aos anos 2000 ao 2003. As contas durante esta lexislatura non se levaron a cabo co rigor necesario e de feito, nunca se aprobaron os presupostos conforme á lei. Os do 2003 leváronse a Pleno en agosto dese mesmo ano, os do 2004 “aprobáronse” o 30 de decembro de 2004, os do 2005, 2006 e 2007 simplemente non foron remitidos ao órgano fiscalizador do Pleno municipal.
As contas tampouco foron presentadas ao Consello durante estes anos, polo que de facer outro informe, esta institución volverá a recriminar á alcaldía de Antas a súa responsabilidade neste asunto. Existe un incumprimento reiterado do prazo para aprobar os Orzamentos desvirtuando o seu carácter de instrumento ordenador da xestión municipal. Nesta lexislatura non se liquidaron os exercicios correspondentes... Por todas estas actuacións o Tribunal de Contas está a investigar ao Concello.
Existen deficiencias e irregularidades na contabilidade, control interno e xestión orzamentaria. Os gastos de persoal, a contratación e reparto de subvencións non se fixeron de acordo coa lexislación e así o levamos denunciando reiteradamente, como reflicten as actas dos plenos. Por non reformar nin se reformou o réxime de dedicación exclusiva do Alcalde que na actualidade é ilegal pois vulnera os artigos 13.4 do ROF e 75.5 da LRBRL.
Agora empeza a verlle as orellas ao lobo pois a Xunta de Galiza non garante o acceso a axudas e subvencións aos concellos, como o de Antas, que ano tras ano néganse a tramitar correctamente os orzamentos.
Antas de Ulla nunca foi un concello que sobresaíra pola habilidade do seu alcalde na xestión de investimentos do Estado ou da Xunta, en moitos casos – como temos confirmado estes últimos anos – porque sinxelamente non se piden, déixanse caducar os prazos ou non se aporta toda a documentación necesaria. Agora a esta ineficacia súmase o galimatías contable que fai opaca a súa fiscalización por parte non só da oposición do BNG, se non tamén das institucións encargadas de vixiar estas anomalías como o Consello de Contas.
Non é de recibo dicir que esta situación, que vén desde hai máis de nove anos, débese á disposición do secretario interventor. A este último non o elixe o pobo pero ao responsable da xestión municipal si. Que cada un asuma á súa culpa e, sobre todo, que propoña medidas para amañar esta situación.
Os anos pasan e os problemas de Antas tanto a nivel administrativo como de xestión persisten.

Luís V Rojo

Foto: Barbalde, outro exemplo de ineficacia e abandono

ESTUDO SOCIOECONÓMICO. A SITUACIÓN DO NOSO CONCELLO

No BNG de Antas de Ulla vimos entregando estes días pasado un estudo socioeconómico que compara a situación do noso concello cos concellos limítrofes. Agolada, Rodeiro, Taboada, Monterroso e Palas de Rei, empregando datos do INE (Instituto Nacional de Estatística) IGE (Instituto Galego de Estatística) e do Anuario económico de La Caixa.

Falamos neste estudo da Variación de poboación, do paro, da variación de teléfonos fixos (como indicador de abandona das casas), da variación de actividades industriais, explotacións gandeiras e renda.

Fácilmente se extraen dúas conclusións: Antas, ao igual que o rural galego sofre dunha alarmente perda de poboación e dun envellecemento da mesma.

Se ben a situación do rural galego é complicada, a de Antas aínda o é máis. Perdemos industria. Somos o concello con menos explotacións gandeiras e coas máis pequenas o que nos leva, por un lado a ter o maior índice de paro entre a poboación activa e por outro sitúa a nosa renda media nun claro descenso. Se ben Agolada e Rodeiro teñen rendas menores ás de Antas, estes dous concellos son os que máis incrementaron as súas actividades industriais, o que os levará, sen dúbida a subir, mentras que todo indica que nós seguiremos a ser cada vez máis pobres!
Posiblemente estemos ante a derradeira posibilidade de virar esta tendencia. O noso concello non se pode permitir 4 anos máis de deixadez.

Entre todos é posíbel!
Se che interesa recibir unha copia do estudo envíanos un correo electrónico a bngantasdeulla@yahoo.es